تاج وصلني يا رجاااااالة

علي كلام سعيد صالح في مدرسة المشاغبين مرسي انهزم يا رجااالة

وصلني تاج من حبيبتي رفقتي وحبيبه قلبي منمن والصراحه كانت اول مرة اعرف ايه اللي بيحصل بالظبط لما حبيبتي رفقه شرحتلي وفوجئت بسيل من التاجات كل ما ادخل مدونه الاقي عاملين تاج ماعلينا الحمد لله عرفت ايه اللي بيحصل بالظبط وحعمله يارب يكون صح اما نشوف بيقولوا ايه في الاسئله حستلم الان ورقه الامتحان وابتدي الاجابه

نبدا بسم الله

اسم مدونتك؟

ما نتو عارفين عباد الرحمن
لماذا اخترته ..وماهي نيتك من وراء اختياره؟

عشقي الشديد لاسم الله الرحمن والايات الرائعه في سورة الفرقان عن عباد الرحمن وصفاتهم وارجو من الله اني انا وانتوا نبقوا من عباد الرحمن دول

هل فكرت في إغلاق مدونتك؟ والسبب؟

مش معقول لالالالا مش ممكن

حتي لو اكتابت او اتخنقت منها حسيبها عسي حد يقرا حاجه فيها يستفيد وربنا يهديه نخدوا ثوابه لان يهدي الله بك رجلا واحدا خير لك من حمر النعم او خير لك من الدنيا وما فيها

صورتك في المدونة ورمزيتها ؟؟

صورتي لونها اخضر اريح لون للعين كما درست ـــ ومتهيالي الرسول صلي الله عليه وسلم كان بيحبه وعباءته خضرة ـــ ومكتوب فيها لا اله الا الله محمد رسول الله اشهر توحيدي لله واول ركن من اركان الاسلام وكمان بيها كعبه وحولها الناس تطوف وانا بحس ان هم دول عباد الرحمن وانا ايضا واضعه صورة في المدونه كعبه وناس بتطوف فعلا هم دول ضيوف الرحمن بحس انهم عباد الرحمن ناس رايحه لربنا تايبه وراجعه من غير ذنوب دا احساسي بالصورة

انا دورت كتير قبل ما احط صورة ولقيت دي بتعبر عن كل احاسيسي

لماذا دخلت عالم التدوين من الاساس؟

اول ما عرفت المجال ده قلت لنفسي ليه ما اعملش واحده اكتب فيها الحاجات المفيدة اللي بقراها والناس ممكن ما يكونوش قروها ويستفيدوا واخد ثوابهم فعملتها وبعدين لقيت اني ممكن اكتب كمان كلام من دماغي من احاسيسي والناس تعليق واستفيد منهم ونتواصل وقد كان والحمد لله

جمله قيلت لك فى وصف مدونتك؟

متهيالي كل اللي بيتقال مجاملات رقيقة من حبايبنا المدونين كنوع من التشجيع انا فاهمه دا كويس وجزاهم الله خيرا

التعليقات بالنسبه لك ,اهميتها؟

بتحسسني ان صوتي اتسمع ونوع من التعاون علي البر والتقوي

احلى بوست كتبته ...ضع اللينك , ثم اذكر لماذا؟

اي نوع من الحلاوة

كنت مبسوطه بيه يعني ولا الناس عجبها ولا ايه بالظبط

أفضل بوست قرأته؟ وضع لينكه؟

كل بوست بقرؤه بيضيفلي جديد خصوصا اني بعشق القرايه جد وبعدين انا ما بقراش لاي حد

وزي ما بيقولوا الكتاب بيبان من عنوانه لما اقرا في المدونه بوستين محترمين مفيدين اتابع المدونه دي وبوستاتها وهكذا يعني

أفضل مدونة قرأتها؟

زي ما قلت في الرد السلبق كل مدونه بتضيفلي جديد وتنمي عقلي او روحانيات تبقي بالنسبالي مفضله

حد قل أدبه فى التعليق إيه رد فعلك؟

الغي التعليق وابعتله اذا كان سايب لينك لمدونه او ايميل كلام حنين لين بيرمي كله علي تقوي الله في مضمونها اتقي الله وابقي عملت اللي عليا نهيته عن المنكر وامرته بالمعروف ولو زود اكتر مرة يبقي اهمله كانه لاشيء والنار بتاكل بعضها ولا ايه

أسوأ مدونة؟

مااعرفهاش وما شفتهاش لغايه دلوقتي

أسوأ بوست أسوأ مدون

ماعرفهوش وما شفتهوش

هيحصل ايه لإيميلك لما تموت ؟؟

الله اكبر... سلام قولا من رب رحيم

انتوا بتبشروا عليا ليه

للدرجادي زهقتوا مني ومش عايزيني علي وش الدنيا

ايميلي حيبقي طول ما الموقع مفعله واول ما يقفل الحساب ويبقي غير فعال خلاااااااااااااااااااص مات زي اصحابه

كل شيء هالك الا وجهه له الحكم واليه ترجعون

اديت الباسوورد لحد قبل كده؟

بريء يا بيه.... دا كلام ناس عاقلين برده

كانت إيه طبيعة علاقتك بيه؟

ولا اعرفه ولا عمري شفته

اسمك؟

ان ان اااااااااااااان ......... تش

دي موسيقي تصويريه لوقع السؤال عليا

انتو عارفين بقي الموقف حساس بالنسبه للبنت

امال انا عامله نيك نيم ليه؟؟؟

احنا عندنا في مصر لما واحد بيتكلم عن مراته بيسميها .....مراتي.... المدام.... الست بتاعتي ......الجماعه والاسم .. نو نو نو

كرملة

علي فكرة دا ملوش علاقه لا من قريب ولا من بعيد باسمي خالص

المشهور بيه وسط اصحابك؟

مشهورة باسمي الاصلي واحيانا بيدلعوني لو هما مبسوطين شويه كل واحد باسم مختلف خالص معرفش بيجيبوه منين

شخصيتك نوعها إيه؟

والله دا الناس اللي تعرفني هي اللي تقول بقي

بس لو فيه حاجه اقدر اقولها

انا بحب التحدي جدا جدا جدا وافضل اقاوح في الحاجه لما تحصل حتي لو ميؤس منها والناس تقولي ابعدي عن الحكايه دي ما فيش فايده منها وانا ابدا حجيبها يعني حجيبها باذن الله

وفعلا بجيبها بفضل الله

السفر بالنسبة لك؟

يااااه متعه ونفسي فيه جدا رغم ان سفري داخل البلاد وليس خارجها بس ان شاء الله حييجي اليوم واعملها

وقت فراغك بتعمل فيه إيه؟

القرايه ثم القرايه ثم القرايه لو من كتاب ماشي لو من جرنان ماشي لو من النت كتب الكترونيه ماشي

المود بتاعك؟

دلوقتي ولا علطول

والله ف الاتنين دايما حالمه بدنيا افضل من ناحيه الدنيا والدين

الاكلة المفضلة؟

والله مش قصدي التكرار بس فعلا فعلا

بموووووووووووت في المكرونه بالباشامل والفراخ البانيه

الصفات اللي أخدتها من بابا؟

للاسف انا متهيالي اخدت اكتر من ماما بس انا زي ما قلتلكوا بالتحدي شفت ان فيه صفات مش كويسه فيه وابتديت اغيرها واخد بنفسي الكويس من بابا ع الكويس من ماما واعدل واكتسب الافضل .....هيه لعل وعسي نكون احسن باذن الله

الصفات التي أخدتها من ماما ؟

الطييييبه وحسن النيه والكرم الزياده

طبعا زمانا مش عايز كده بدات اغير شويه وامشي بمبدا حرس ولا تخونش

اكتر ست حاجات بكرهها؟

يوووووة اقول ايه ولا ايه

الباميه...التخلف العقلي اللي بتجيبه المسلسلات ...عدم نظافه المكان ...الرجاله اللي ستاتها ممشياها....الغباء....ان حد يزن عليا ف حاجه انا مش عايزاها

اكتر ست حاجات بحبها؟

المكرونه بالباشامل ...االقرايه ...النظافه والتجديد والتغيير.....عمر بن الخطاب ....المخ الكبير الواسع اللي يوديك البحر ويرجعك عطشان ...السفر والبحر

الشغل بالنسبة لك؟

وجع قلب وبهدله وانا ايه اللي يخليني اعمل ف نفسي كده

انا الحمد لله مش محتاجه لا ماديا ولا روحيا ولا نفسيا ولا اجتماعيا ولا زهقيا ...ههههههههه

وقرن في بيوتكن

الانترنت بالنسبه لك؟

عالم مفتوح في الاوضه اللي انا قاعده فيها ومجال واسع جدا للقرايه

اللي محببني فيه ان اصله قرايه اي صفحه تفتحها

امرره

لحبيبه قلبي صاحبه مدونه نعم الثواب اصلها زي حالاتي ما جالهاش تاج قبل كده والباقي جاله تاجات كتير سامحوني يا حبايب قلبي